每日一影

每日都同菲比影d相，都已經一年有多啦！

依年幾裏面只有幾日係唔記得/唔得閒同菲比影相，

都估唔到自己可以堅持咁耐...

有時連續幾日都係影到同一個樣，

都有諗過放棄，自己鐘意幾時影就幾時影啦！

但睇翻d相，雖然好似同一個樣，但都會有d唔同表情o既！

佢鐘意笑時就會影多d...

成個無牙婆咁咪影少d囉！

由幾張到幾十張甚至幾百張都有...

宜家相簿裏面大部份都係菲比o既相啦！

22-4-2012遊學團

又到返學o既日子啦！

今日菲比好乖吖！原本安排咗個師姐監視我o地，

點知師姐話菲比今堂好乖，搞到佢好悶，

哈哈！菲比第一次比人讚乖...

今堂無帶腰腰，無人幫我同菲比影跳欄跳藤圈相...

菲比﹕媽媽，好悶呀！有無街去呀！

媽媽﹕今日要去返學呀！

菲比﹕係咪真o架！

菲比﹕yeah！真係有學返喎！

同學仔媽媽成日都可以影到菲比個黑色SNOOPY樣...

嘩！佢係邊個呀！點解唔同晒樣o既！

影佢側面佢又無端端轉過o黎...

師姐想搵菲比試範搶繩，可惜菲比今日好乖，

無搶繩，其實菲比已經好耐無搶繩啦！

佢平時唔係搶繩，係樸我要我抱多...

依四個小朋友依兩個月堂堂坐埋一堆，

變得好friend，菲比最初成日都吠第二果隻唐狗，

宜家好近距離都無問題啦！

自由時間，影下相先，睇下菲比個樣幾冧...



菲比，可唔可以鍚鍚呀！

菲比﹕等我諗諗先啦！

菲比﹕好啦！好啦！應酬下妳啦！

師兄出馬，狗狗d動作都做得足d...

睇下Money望住師兄好似望住偶像咁...

Money爸又想學師兄，哈哈！

菲比好耐無試過一上車就瞓啦！今堂辛苦晒...

嘆牛骨

買咗杜蟲藥比菲比，我星期一晚收工比咗半粒菲比，

佢連痾幾日軟便，師姐教路，停正餐，

只比牛骨菲比咬，即時落樓買牛骨啦！

$16牛骨可以分三袋，每袋都有4-5條，

每次烚一袋，都可以咬4、5日啦！

骨骨放入滾水烚3分鐘，千祈唔好烚到熟，

熟骨好脆，會拮穿狗狗o既腸o架！

菲比今日就咬依舊骨骨啦！

仲識得瞓係到慢慢嘆添...

一舊骨骨可以咬足一日...

菲比﹕我啲牙白唔白呢？菲比d牙本身都好白，

宜家咬過兩次牛骨後就白上加白...

菲比﹕咁我要努力d擦牙先得，唔知有無人搵我拍狗狗牙膏廣告呢？

另外將一舊一開二比咗一舊阿Q，

另一舊比埋菲比，因為係牛軟骨，

所以菲比食咗軟骨先...

菲比好怕我將D食物比阿Q，有時都會因為咁大打出手，

但菲比從來都唔會咬阿Q，反而阿Q就會咬菲比，

好彩阿Q得一隻尖牙！唔係菲比就大鑊啦！

菲比飲食

自從轉翻食乾糧後，好耐都無寫過菲比飲食啦！

因為每日兩餐都係乾糧，

因為腳仔成日流血，買咗魚油比佢撈糧，

點知撈果餐佢肯食，唔撈果餐就望住樽魚油，

唔可以餐餐都撈魚油喎！

開頭果個零月食得唔錯，之後唔知係咪因為返學食肉食得多，

佢又唔食乾糧啦！唔食隨便妳啦！妳自己餓啫，

有成個幾兩個月菲比係四餐先食一餐，

到上個月開始肉肉o既份量多咗，因為同佢做多咗指令，

諗住佢更加唔食乾糧啦！點知個衰妹反而食得穩定咗添，

每日最少一餐清兜，有時兩餐都完食...

到宜家都係每日最少一餐清兜，所以都考慮好唔好同佢轉食一餐...

最近比咗兜糧菲比，佢有時都唔食，跟住係我腳邊，

就出去陪佢食啦！有時我一坐低佢就即刻食，

有時都係唔食，咁就搵d朋友仔幫手啦！

菲比﹕做咩用個兜壓住我個朋友仔呀！

菲比﹕點算好呢？

菲比﹕點解佢個鼻鼻有粒糧o既！

最後都係無食，因為佢一食個糧兜就郁，所以佢即閃...

都係放返係個架到啦！點知佢又拿拿臨食晒...

仲識得坐定定等清兜獎勵添...

乖乖食晒d糧，抵獎...

依d就九秒九，食糧係咁就好啦！

第二日又係唔食，又要出動朋友仔...

某晚放工又夜媽媽放狗啦！好耐無夜晚帶佢落街，

因為都好驚佢失控，咩都吠一餐...

點知都OK喎！淨係吠過一個男人一兩聲，

叫佢停就停，無好似之前咁係咁吠...

下次放工都可以同佢落街散步啦！

15-4-2012 I-Kennel 11週年 暨 PetMAX搬遷後重新啟業同樂日

今日係百樂寵物會11週年暨PETMAX搬遷後重新啓業同樂日，

本來有100隻狗SIT30秒創舉，但因為某D原因要改期啦！

唔緊要啦！照可以去反，對於菲比係一件好事...

出咗咁多次街，菲比第一次自動自覺走入狗袋坐，

但裏面滿載我同佢o既物件，菲比只有三份一個袋可以坐...

買咗個水樽袋，諗住用黎做零食袋，

點知個盒太大，入唔到，所以用個啫哩杯，

放咗d肉肉入去，比咗腰腰用，佢勁開心，

不過有好多狗狗追住佢，因為佢個高度，

d狗偷食啱啱好。

依度雖然無彭福咁大，但可以跑下都唔錯吖！

頭幾張影到菲比好似追住腰腰d肉肉，

其實佢只係追腰腰啫...

呵呵！菲比都有份上台表演服從，真係笑屎人啦！

無諗過有佢份，只係隨便問下腰腰帶菲比表演得唔得，

師姐答可以表演小狗拖小人玩跳欄，我知自己實會怯場，

菲比都唔會做得好，所以無諗過會上去表演，

仲霸咗個頭位諗住幫佢o地影相添...

腰腰個高度影佢o地啱啱好，影得好靚...

唔話你o地知可能大家會以為係菲比，佢係少爺尖...

腰腰平時睇相已經話想玩，今日終於都有得玩啦！

不過今日少爺尖大勇，成日都接到個波...

腰腰攞住個噴壺係咁噴丫bell

腰腰又想拖菲比玩跳欄，

真係驚佢比菲比扯跌...

都係拖少爺尖輕鬆d...

順便影張相先啦！

考鐘意依張相吖！

食燒肉

丫bell好令令呀！

等到五點，終於到我o地游水啦！

菲比自己玩玩下跳咗落水，諗住救佢時搞到我都濕晒...

睇黎玩得最開心o既係腰腰...

丫bell好叻叻

反正都濕咗，一於再放菲比落水影下相，

點知佢游都唔游，一味爬上岸...

腰腰表演咬菲比

其實係用口餵菲比食肉肉

當然唔少得我啦！

今日菲比參加咗跑步比賽，用咗3.126秒跑咗50尺，

無睇最後結果，唔知菲比有無機會第一呢？