寶貝甜心

我發覺自己越來越唔想離開菲比太耐，

平時返工已經係極限，

如果唔係返工都唔想留

菲比自己係屋企，

好想盡量去邊都帶埋佢去，

但菲比又唔肯入狗袋，

去飲茶都唔可以帶埋佢去，

本來行去飲茶果段路

係好適合比狗狗散步的，

而且同茶樓都好熟，

如果菲比肯入狗袋，

就算佢要伸個頭出來都無問題的，

可惜佢唔肯入狗袋，

所以少咗好多去街機會。

上星期表姐叫我食完Buffet後，

北上按摩兼過夜，

之後第二日去整指甲，

行東門，跟住就去返工，

我就諗，如果咁樣，

我就成四十個鐘頭無得見菲比，

菲比都會好可憐，

要比人困係籠到咁多個鐘。

後來我同佢講我唔去按摩，

表姐就話咁第二日一齊上去啦！

第二朝，因為屋企全日都無人，

平時媽咪同爸爸都會返下屋企，

唔會全日無人，

我真的唔係好捨得

留低菲比一個係屋企咁耐。

又怕個廳好焗...但又應承咗人，

而且佢o地都就我遲一日先去，

我唔可以放人飛機的，

最後決定困菲比係房，

開個風扇比佢，起碼佢唔會焗親，

但都一路擔心佢會抓門抓到對手損晒...

唉！下次如果屋企咁長時間無人，

我都係唔好出去喇！

搞到成日心掛掛，

本來北上完係直接去返工，

最後因為太掛住菲比，所以...

曠工一天...

好鐘意依張相呀！

 

 

菲比呀菲比，

即使你仲未次次去啱洗手間，

即使你經常破壞王上身，

即使屋企人成日投訴你，

即使你唔可以比人摸，

最多我每日帶你出去散多一次步，

等你少d機會係屋企周圍痾...

最多我盡量將可以被你

破壞o既東西放好，等你無得破壞...

最多睇緊d你，唔好比你影響屋企人，

最多每次有人想摸你，

我就要同人講唔可以，因為你好惡，

唔比人摸，不如你比佢聞下先...

縱使您唔係一隻聽教聽話的狗狗，

但我要比您知道，

您永遠都係媽媽o既

寶貝甜心

我會盡我能力，慢慢教您，

帶您見多d人，

見多d狗，

希望有朝一日您有機會

成為一隻人見人愛的小傢伙！