令人難過的消息

師姐放咗張新成員相出黎，佢叫summer，

有人問幾時會多隻winter，師姐話考慮儲齊春夏秋冬，

我就搭訕話佢屋企宜家有四隻狗狗，幫另外三隻改名咪齊囉！

夜晚有人問師姐仔定女，師姐答女，我又多口話3男3女，

之後就收到師姐Whatsapp話小丸走了...

吓！點解o既！原來小丸係1-6-2012走咗，

雖然只見過小丸兩次，其實三次，第一次因為未識得師姐，

所以無留意到小丸，我啲眼淚好似失控咁，

真係太突然啦！上晝見佢仲好地地，轉頭小丸就去咗另一個世界...

師姐話我幫佢影咗最後o既照片，果d相本來係影比佢o地睇，

佢o地去咗渡蜜月，以解佢o地相思之苦的，

竟然成為咗小丸o既遺照，而且小丸都等唔到佢o地返黎，

更加難過，我仲話師姐好犀利，我可能會發癲，

師姐唔止教狗叻，EQ都好高，佢話癲小丸都唔會返黎，

只會令身邊人難受...每晚都喊到瞓著，summer係愛的替身...

成個六月上咗兩堂，我又經常會問師姐問題，

覺得自己好衰吖！咁都無察覺到有唔妥，

到師姐打果句小丸走了時我都正想問佢問題，

師姐話就係因為好多人有問題問佢，佢先無時間諗其他o野！

咁我話要問多d啦！佢話我真係要問多d，

因為我對狗狗o既知識實在...

真係要多謝師姐，係自己咁傷心難過o既日子，

仲會記掛住我o地o既狗狗，佢仲記得問我幾時安排菲比做絕育手術，

如果唔係佢提一提，唔知我會唔會又過咗時間都未去book診所呢？

第一次見小丸，係舊年11-12-2011麥花臣球場

當時唔認識佢o地，唔係影咗好多相...

師姐話呢次係小丸最後一次上舞台

第二次見面，今年o既探訪活動，呢次都係小丸最後o既一次探訪，

第一次見佢o地總動員出席，先發現師姐同師兄都好鐘意黑色...

如果烋呔強都係黑色，就成個家庭都黑麻麻...

1-6-2012小丸離開當日，百樂有探訪活動，

我見佢同師傅玩緊，影咗d相，放上fb，

等佢父母可以見下佢o地，真係無諗到幾個鐘頭後...

小丸最後o既照片，竟然出自我o既竟頭下，

小丸，希望你宜家已經成為快樂o既天使...

小丸事件令我更珍惜菲比，好怕菲比同樣突然咁...

所以要更珍惜可以相處o既時間...