媽媽係19-8-2012離開咗我哋！
到宜家都覺得好似發緊夢，
實在太突然啦！
入院十日，前一日媽咪仲打黎話醫生話心瓣發炎，
打一個星期至個半月抗生素，
就會無事，19號零晨臨瞓仲諗上晝去探媽咪，
抑或夜晚去，點知朝早6點幾收到阿嫂電話，
話醫院打比佢媽咪情況轉差，
我哋即時趕去醫院，連得19日大o既姪女都帶埋去，
一去到媽咪已經陷入昏迷狀態，抱咗bb入去見媽咪，
然後醫生就解釋媽咪情況，
嚴重惱出血，本來可以即時推媽咪去手術室做手術，
但因為媽咪有心臟病，一直都有食薄血丸，
佢d血好希，小小傷口都有機會造成流血不止，
何況係開惱，醫生話如果即時就同媽咪做手術，
佢可能連手術台都出唔到，我哋連佢最後一面都見唔到，
照過惱素描媽咪有半邊惱比血壓住咗，
同佢吊凝血藥先，9:00再照惱素描再睇下做唔做手術，
但係媽咪永遠都唔會回復清醒，已受損o既惱組織唔會復原...
8:00醫生話媽咪瞳孔已經擴大，即無希望了，
但都會同媽咪照多次惱素描確定，
出來結果媽咪惱部有更大面績比血壓住，
醫生叫我哋要有心理準備，快則5個鐘頭，
慢則都係兩日內，眼晴已經喊到腫咗，
但眼淚都係唔受控制，身邊啲人仲係到講尋日探佢仲好地地，
有講有笑，點解今日會咁，
我好後悔點解尋日唔去探媽咪，
(因為媽咪間唔中都會入院，佢成日都話入院當渡假
所以唔太嚴重我都會隔日去探...)
仲走去深水埗買整夾仔同圍巾o既材料，
以後都聽唔到媽咪講嘢啦！
爸爸話可能係吊完抗生素，媽咪痛得濟，
痛到惱中風，因為前兩日媽咪吊完抗生素都打比爸爸話好痛，
點解無人話比我知，我去探媽咪時佢好似無咩事，
令我更加難過...
親戚陸續到黎睇媽咪，我一直企係床邊，
大家都覺得要通知爺爺嫲嫲，所以叫咗姑丈表姐同表姐夫去通知佢哋，
佢哋聽到後失控咁要黎醫院見媽咪，
最唔想見o既情竟，一對老人家企係媽咪床邊係咁喊，
我都快要崩潰啦！
好唔捨得，真係好唔捨得，好希望有奇蹟出現，
到4:00己經有過佰人黎見過媽咪，
留守係醫院o既都有成7、80人
5點零鐘細佬見到部機d數字係咁跌就去咗搵醫生，
當時我唔知道，企咗係床尾，突然好想摸下媽咪隻手，
行到去摸咗媽咪兩下，醫生就企咗係我後面，
之後我哋就出晒去，入返去時媽咪已經由鼻喉換咗養氣罩，
5點幾，哥阿嫂趕緊黎，但姑媽覺得唔對路，
叫我洗條毛巾同媽咪抹面，我知咩事，
攞住條毛巾一路喊一路行去洗手間，一路同媽咪抹面
一路叫媽咪，我知道我以後都無得叫媽咪啦！
然後姑媽叫我攞把梳同媽咪梳下個頭，
同樣一路梳一路叫媽咪...幾分鐘後醫生就宣佈媽咪死亡...
哥哥阿嫂諗住返屋企休息下夜晚黎接班，
點知返到屋企瞓落床阿哥就覺得好唔安落，
叫阿嫂返醫院，駕車開到半路就收到電話叫佢趕返醫院，
但始終都係見唔到媽咪最後一面...
在場o既親友圍滿媽咪張床，病房，走廊，同病房外，
d喊聲搞到連護士都喊埋一份...
返到屋企眼淚仍然流過不停，夜晚瞓下醒下，
每次醒時都係兩行眼淚係到流，
好想瞓醒發現原來自己係到發緊夢...
8-9-2012
