全職無牌主婦

返埋今日工，星期一起我會做全職無牌主婦大約兩個月啦！

哈哈！點解要叫全職無牌主婦呢？

因為我未結婚，所以唔會係主婦，

但係我打後大約兩個月都會做家庭主婦做o既嘢！

湊臭B啦！晒衫啦！煮飯啦！

掙在唔使打掃啫...

自從媽咪入咗院，我哋就計劃請個姐姐返黎，

可以照顧媽咪同臭B，姑媽仲話姐姐未黎前，

媽咪未出院或者無能力照顧臭B佢都可以幫手...

媽咪走前嗰日姑媽同佢講叫佢放心休養，

如果臭B無人湊佢會幫手湊，

媽咪仲好開心同佢啲妹講，我哋姑媽幫手湊BB...

點知世事難料，姐姐未請媽咪就...

辦好媽咪後事後，我哋去睇姐姐，

想要一個未黎香港做過o既！

又要一個唔怕狗兼鐘意狗o既！

結果最快都要十一月中先可以到香港。

臭B媽媽十月三日就開始返工啦！

咁唯有叫姑媽幫手湊個半月，

我湊到返工前抱比姑媽，BB媽媽放工去接臭B...

一切計劃好晒，到臭B媽媽返工嗰日，

上晝我係屋企湊B，到要預備返工一刻，

覺得好唔捨得，好想唔返工湊臭B，

抱完比姑媽轉身走嗰刻真係好想喊...

所以開始諗不如唔好做，反正都好唔想做呢份工，

辭工係屋企湊臭B到姐姐黎啦！

考慮咗兩日，最後決定辭工湊B，

因為實在無法接受我抱湊B去姑媽屋企，

然後走咗去返工，嘻嘻！其實係藉口，

因為自己都好唔想做呢份工...

臭B咁可愛，真係日日對住佢都唔會厭呀！

臭B妳係我哋家第一個BB，簡直係萬千寵愛於一身，

每個人聽到我有咁決定都讚成，

唔係就話點解唔比我湊呀！等我都玩返個零月啦！

個個都掙住湊臭B，你話我呢個姑媽又點會捨得你呢？

臭B，我知道嫲嫲會保佑妳健康快樂咁成長o既！

希望呢個幾月妳唔會比姑媽寵壞啦！