信不信由你

我一向都唔信問米呢樣o野！

但去問媽咪，點都要去聽下啦！

21-10-2012我哋去咗問媽咪，

好多姑姐叔婆去，連嫲嫲都去，

廿幾個人迫係人哋個廳度，

個問米婆有啲不滿，厭我哋多人去...

全部人坐底晒，佢就唱咗兩句歌仔，

之後就停咗，問我哋係咪有人有月事，

之後加句啱啱過都係，明明黎到門口都唔敢入黎，

當時我抱住臭B，因為想試下個問米婆會唔會話個BB係我...

有D驚驚地，始終都未接觸過問米呢樣o野...

一直都係睇電視拍晒枱，等上身之類，

原來係對問形式...

之後有人話啱啱過，佢就比咗埋葉佢攞住，

之後又唱咗兩句歌...

(以上相片係29-9-2012去驗屋時影的，菲比第一次比我細佬揹住，
佢唔鐘意，但又唔敢掙扎...)

之後就同我哋講佢好唔開心，

姑媽問佢咩事唔開心，佢話媽咪話點解佢外家有人，

但係無人黎，爸爸就同佢講，太早啦 ！佢哋唔黎，

本來細姨想黎，但咁啱又要去問佢奶奶...

之後就話佢有三個仔係度，姑媽叫佢講清楚d，

佢話有三個仔，好肯定咁講有三個仔，

姑媽話妳去邊度搵三個仔，

佢話兩個係陽間，一個係陰間，(即係媽咪帶埋嗰個細佬黎)

我話係呀！媽咪講過以前因為諗住移民美國，

怕去到未適應就要生bb，所以落咗一個bb，

但我唔知係細佬黎，阿爸就話係佢都知係仔...

佢話兩個新抱都有去，佢當兩個新抱係女，

兩個新抱都好錫佢...

之後就話因為爸爸未死，佢唔可以跟祖先住，

宜家自己住我哋燒比佢嗰間大屋，佢仲話佢出殯嗰日好風光...

又話陰間個細佬未結婚，所以都唔可以跟佢住，

佢好想我哋幫佢結婚，等佢哋可以一齊住，

之後嗰個細佬又搶住講，我哋三個咁多年黎都無理過佢，

無燒過嘢比佢，佢無衫著，無錢用，連媽咪出殯嗰晚都無人燒d嘢比佢...

姑媽叫佢宜家可以問媽咪攞錢啦！

佢宜家只有一個要求，就係想結婚，

之後搬去同媽咪住，咁就可以陪媽咪，

姑媽就話返去慢慢商量下先...

之後問米婆又唱咗兩句歌，

就話媽咪話佢有個女係度，仲未結婚，

佢最唔放心o既就係我，好想我可以有自己家庭，有老公錫...

估唔到媽咪走咗都要為我掛心，親戚就叫佢保佑我搵到個好老公...

之後就佢就就佢有個孫女都有黎，

叫我哋要睇住BB...

佢好想活多十年，睇住BB大，

姑媽問佢，想活多十年又咁快走，

佢話佢命盡...

跟住又話爸爸做咩要哩埋一角，因為太多人，

爸爸坐咗係角落頭，叫佢坐出去，

有說話要同佢講，佢問爸爸佢啲錢同金器有無搵到，

爸爸係度一路喊一路點頭，媽咪就叫佢要保重身體，

宜家得翻D仔女照顧佢，自己都要好好照顧自己...

之後就話佢好難過，因為要嫲嫲長輩白頭人去問佢，

又話要佢哋兩老白頭人送黑頭人，

問佢點解咁辛苦要去問佢，叫佢要保重...

仲有其他叔婆都要保重，長輩去問佢後輩，

佢好過意唔去...

又話有好多姑姐去，連姑媽阿嬸佢都知有去，

叫佢哋要教我哋幾兄弟妹，我哋有好多嘢都唔識，

要靠佢哋兩個...

之後話佢係陰間已經遇到祖先，有個叔叔，

姑媽問佢仲有無，因為有個堂哥早幾年走咗，

姑媽好想知佢哋有無遇到，但問黎問去佢都無話遇到姪兒...

媽咪真係數晒我哋咁多人...

講講下又問點解外家無人黎，

媽咪可能好想見外家o既人，

之後同阿姨佢哋講翻，因為我哋諗住遲d去屯門問多間，

阿姨話下次一定要叫佢...

問到支香都燒完好耐，個問米婆都無話要加錢，

突然個問米婆減晒口話有得揀我都想活多十年，

但係命盡無辦法，姑姐去問過好多次呢個問米婆，

佢都未喊過，應該真係媽咪上咗佢身...

姑媽問佢仲有無嘢講，無就慢慢行返去，

問米婆話媽咪走咗喇！我哋就講都幾準喎！

真係知道有咩人係度...

突然問米婆話你做咩返轉頭，

之後就同我哋講，佢問你哋啲錢同金器有無搵到，

頭先無答佢，頭先爸爸淨係點頭無答到佢，

之後姑媽話搵到啦！佢就走咗...

一路都唔信呢樣嘢！但又真係好神奇，

問米婆唔知我哋o既關係，媽咪同哥哥細佬講嘢時佢會望住佢哋，

明明我抱住BB，媽咪有個女時佢又望住我，另外我堂妹係度佢都無望錯...

就算真係邪靈係度作怪，都可以比我哋知道媽咪宜家點，

雖然我哋都係唔多信，但問完都係求個安心...