第二堂義務訓犬班

其待了一個星期o既訓犬班又到啦！

今日我同菲比五點幾出門口，點知遇著塞車，

等咗好耐先有車，去到元朗都已經七點半啦！

去資深換翻件衫，點知無晒碼，就換咗兩包零食比菲比，

之後行埋北京，就坐的士入去，去到先八點十二分，

未開門，要係門口等...

一早六點起身返工，比包即食糧菲比食先，

佢唔使幾啖就食完lu，都唔知夠唔夠飽...

放工都烚定D雞柳同雞軟骨，加D青瓜比菲比做晚餐...

落雨，諗住同菲比著雨樓，不過又怕太焗...

都係影下相算啦！

乖乖影相，GOOD有獎勵...

由元朗去訓練地點大約十分鐘路程，

但一張靚D相都影唔到...

今堂菲比無上堂咁驚，一開始我就唔比佢上梳化，

起初都有想跳上來，NO多幾次佢就乖乖坐係到啦！

今堂佢o地有比菲比玩跨欄，菲比玩得好叻叻，

有個導師發現每次玩完跨欄我帶菲比返埋位時佢經過隔離隻黑色大狗都會向後退，

佢話菲比好驚果隻狗，要我比翻d信心菲比，

叫我行過去叫隻狗sit，佢sit咗就good佢，然後比食物佢，但一定要惡，唔可以笑，

我心諗唔係掛，大狗我都驚喎！不過為咗菲比，都要頂硬上，

不過可惜要我惡d，我真係做唔到，仲要係到笑添，

所以我今個星期o既功課就係要練個惡樣出o黎，

同埋練多d好嚴肅咁講sit、good，下堂再試過...

今堂個領袖問我係唔係經堂見到狗就會抱起菲比，然後狗呀！就轉身走，

哈哈！係就係，不過都係見到大狗同流浪狗啫，

佢話其實菲比有咁o既行為係因為佢想保護我，因為佢感覺到我驚，

所以佢要保護我，好似d人想模佢，通常都係我抱住佢o既時候，

我會驚唔知菲比會唔會咬人呢？菲比感覺到我驚，

佢又唔識分我驚d咩！所以佢就覺得果個人對我有威脅，

佢伸手埋o黎係想攻擊我，所以菲比就要咬佢，

所以要菲比唔咬人，首先要我唔好咁驚青，比翻多d自信，

令菲比有安全感，佢就應該唔會再咬人啦！

希望我可以做到啦！

今日佢o地都教咗我拖繩，菲比一教就識，

佢o地仲讚菲比好易教添，其實一路以o黎都係我太驚青，

成日怕踩親佢，所以條繩會放得比較長，等佢可以行遠d，

唔使比我踩親，佢o地話唔會o架！佢o地(D狗)好醒o架！識得避...

希望我同菲比都做得到，上完六堂後大家都有所得著啦！

今日都係十一點零鐘完，一完就call的士去恆香，

諗住搭小巴返屋企，點知打第一個電話佢話一陣覆我比車牌我，

等咗成五分鐘都無人覆我，於是打第二個電話，

又係話等覆電話，又等咗成五分鐘都無人覆我，

於是入返去救求，因為要趕尾班車丫o麻！

係心急d，佢o地比咗個電話號碼我，我就打去﹐

依個即時比車牌我，不過要等八至十分鐘，

都照等啦！好過咩都無回覆，點知一收線有個司機打o黎話係邊度邊度，

大約三分鐘後到，當時又落雨又抱住菲比，都無手打翻電話比之前個司機，

係我坐的士出去的時候就見到果駕車入去，

之後又收到之前唔知第一個電話定第二個電話o既司機電話話佢到咗，

但佢o地話會覆我的，點解又直接去到o架！

最後我o地去到小巴站已經十一點二十八分，

我個電話快咗小小，應該二十五分左右，

我o地上次三十五分先到都有車，

於是等咗一陣，點知無車，問下人先知尾班車正常開十一點半，

但有時人多快上完客就會早開，所以已經無車，

佢仲教我去冬姑亭坐小巴去上水再轉車返大埔，

唉！都無辦法啦！唯有照做啦！

行行下記得巴士尾班車好似無咁早喎！

於是塞菲比入狗袋先，怕去到巴士站先塞會比人見到，

又怕佢到時掙扎，早d放佢入袋可以比小小時間佢掙扎先，

果然不出我所料佢要掙扎一番，去到巴士站我一路都無理佢，

只係隻手按住個袋口啪鈕位，千其唔好比佢走個頭出o黎！

結果順利上車...

本來都怕佢係狗袋入面咁耐實會發出聲音，

點知佢一路都好乖乖，我無按住個袋口佢都無嘗試走出o黎，

又一大進步，又要讚一句GOOD...