點做好

前兩日返屋企菲比同平時有d唔同，除咗一返到屋企佢會樸我外，

又痴到實一實，連去洗手間都跟住晒，我想抱佢又避開我，

要叫好耐先肯過o黎！諗起都心痛呢？菲比呀！菲比！

到底媽媽返咗工，妳係屋企發生咗d咩事呀！

其實我都估到八九成，因為阿Q過咗黎！

例牌阿Q吠菲比就會跟住吠，

而阿Q係到佢2個一定鬥吠，遭殃的一定係菲比，

我估佢都係比人打過黎...

其實十二月都試過一次，有日返到屋企佢又跟出跟入，

眼神同平時都唔同，果晚開始佢就要瞓係我心口啦！

所以依兩日佢要瞓係我心口，我都比佢瞓，

因為真係唔知發生咗咩事，

佢已經有成個月無主動瞓上我心口啦！

屋企人比個限期我，因為遲D屋企會有新成員啦！

依個新成員係幾代人期待已久，為咗佢，真係會送走菲比o架！

我都作咗最壞打算啦！同菲比搬開住，但以我咁大頭蝦、

又神經質o既人，要自己一個住又真係談何容易丫！

宜家有屋企人一齊住，但係如果我最後一個出門o既話，

我起碼都要行返屋企三次以上先可以確保自己已經鎖門，

試過行咗幾轉，上到車又會諗唔知鎖咗門未呢？

好驚自己未鎖門，又驚自己煮o野時無熄火，

試過熄到最細火以為自己熄咗火，

真係無熄火火燭咪燒死菲比，

諗到依d我真係無勇氣自己搬開住...

所以我都好努力咁教好菲比，但係菲比就越來越強，

我應該要比佢更強先可以成為佢o既領袖，

但係...真係唔好提喇！我都努力緊去保謢菲比，

我係屋企無人可以郁佢半條狗毛，

但我唔係屋企呢？菲比宜家仲會周圍痾，

尤其是阿Q係到時，跟本就唔知係邊個痾，

但總會賴係菲比痾...

另一方面我好努力咁改善菲比細膽o既性格，

佢o地就不停咁去嚇菲比，咁樣要點先可以教好菲比呀！

之前師兄佢o地上過黎幫過我o地，情況好咗好多，

聽佢講完我心都實晒，佢話菲比係屋企好似過街老鼠咁，

唔敢光明正大行係聽中間，成日都左閃右避，

真係好心痛，好彩佢o地幫菲比，等佢無咁驚，

果排情況真係好咗好多，加上我做咗小小動作，

菲比竟然自己擔玩具去聊我細佬玩，

但依兩日菲比又變翻過街老鼠，行出行入都左閃右避...

其實菲比返學後佢一路都升緊le，但我就一路都升唔到le，

所以有d覺得自己管佢唔住，

試過幾次我阿媽行過企係我房門口，菲比以為佢要入o黎，

竟然想樸去咬佢...如果佢咬到我阿媽，

我真係唔知點好呀！如果我管得住佢，佢都唔會咁做...

菲比有咁o既行為係我做成，

所以希望返學可以幫到佢，點知佢升le時我又無升le，

好似越搞越衰咁，越來越多問題出現啦！

完全係我唔夠型，做唔到佢領袖，同師兄姐佢o地無關，

佢o地個個都好好人，好盡心去幫每一隻狗狗，

依幾日都掙扎緊好唔好帶菲比去上堂，

但唔帶佢去上堂我又實搞佢唔掂，到底點做好，

真係好驚有一日放工返到黎無菲比樸我腳，

咬我襪，跟出跟入...